රටම කළඹමින් සිරිපා පාමුලෙන් හමුවූ පා සටහනේ සත්‍ය කතාව හෙළිවෙයි

ශ්‍රී පාද රක්ෂිතයේ අප්‍රකට පා සටහනක් පිළිබඳ පුවතක් මේ වසර මුලදීම මාධ්‍ය මගින් දසත පැතිර යන්නට විය. ශ්‍රී පාද රක්ෂිතයේ ඇති කලු ගල් තලාවක එබී ගිය මිනිස් පා සටහන් දෙකක සලකුණු බොහෝ දෙනෙ‍කුගේ අවධානයට ලක් වූ අතර එය දැක ගැනීම සදහා දස දහස් ගණන් මිනිසුන් එම පාසටහන් දැක බළා ගැනීම සදහා ඇදී එන්නට වූහ.

සිරිපා සලකුණ වශයෙන් සැලකෙනුයේ එක් පා සටහනක් වුව මෙහි මිනිස් පා සටහන් දෙකක්ම එක සමීපයේ දක්නට ලැබීම විශේෂත්වයක් වන අතර. එමෙන්ම මෙය ප්‍රමාණයෙන් අඩි එකහමාර බැගින් සාමාන්‍ය මිනිසෙකුගේ පා සටහනකට සමානය. මෙය කලු ගලක එරීයාම නිසා මෙය කිසියම් ගුප්ත අද්භූත බවක් ඇතැයි යන්න බොහෝ දෙනාගේ විශ්වාසය විය. එහෙත් මේ පා සටහන් පිළිබඳ සැඟවුණු ඇත්ත කතාවක් තිබේ. රසවත් බවින් ද අනූන එයට මුල පිරෙන්නේ මෙලෙසිනි.මෙම පා සටහන පිහිටා ඇත්තේ මස්කෙළිය – සාමිමලේ ප්‍රධාන මාර්ගයේ ග්ලැනුජි මංසන්දියෙන් හැරී ගාඩ්මෝර් මාර්ගයේ යනවිට හමුවන ගාඩ්මෝර් කඩමණ්ඩියෙන් කිලෝමීටර් 06 ඔබ්බෙහි පිහිටි තේ වතු යායක් මැද්දෙහිය. ෆෝක්මෝර් වතුයායේ නව ෆෝක්මෝර් කොටසට අයත්‍ මෙය ශ්‍රී පාද රක්ෂිතය මායිමේම පිහිටි ගල්පොත්තක් මත පිහිටා ඇති.මෙම ගල්පොත්ත බෑවුම් ස්වබාවයකින් යුතුය.

ග්ලැනුජි මංසන්ධියේ සිට ගාඩ්මෝර් දක්වා සාමාන්‍ය වාහනයකින් යා හැකි වුවද එතැන් සිට ෆෝක්මෝර් දක්වා ඇති කිලෝමීටර් 06 වාහනයකින් යාම තරමක් දුෂ්කරය.මෙම අද්භූත පා සටහනේ කථාව ඇරඹෙනුයේ එහි වතු සේවකයෙකු වන පරමනාදන් හෙවක් කාමරාජ් ජනවාරි 01 වෙනිදා මධ්‍යම රාත්‍රියේ දකින සිහිනයකිනි. ඔහු පවසන පරිදි එම මධ්‍යම රාත්‍රියේ දී සුදු තලප්පාවක් බැදගත් සැරයටියක් අතැති තාපසයෙකු වැනි පුද්ගලයෙකු පැමිණ අසවල් ස්ථානයේ ‘රාම දෙවිදුන්ගේ’ පා සටහනක් ඇති බවත් එයට නිසි පුද පූජා වත්පිළිවෙත් පවත්වා ආරක්ෂා කරන ලෙසත් පවසා තිබේ. ඉන්පසුව එම තාපසයා සැනෙකින් අතුරුදන් වූ බව පරමනාදන් කියයි. ඉන්පසු තම සිරුරම දහඩියෙන් තෙත්වී නින්දෙන් පිබිදුණු බවත් ඉන්පසු පසදා පහන්වනතුරුම තමන්ට නින්ද නොගිය බවත් පරමනාදන් පවසා තිබුනා.

Loading...

ඉන්පසුව පසුදා අලුයමින් තමන් එම ප්‍රදේශයේ කෝවිලක පූසාරි කෙනෙකු හමුවී එම පුවත සැලකොට ඔහුද සමගින් එම ස්ථානය පරික්ෂා කිරීමේ දී මෙම පා සටහන් දැකගත හැකි වූ බවත් ඉන් පසු එමගින් ලැබුණු ප්‍රසිද්ධිය මත බොහෝ දෙනෙකු පැමිණ එය රාම දෙවිදුන්ගේ පා සටහනක් වශයෙන් සලකා වැඳුම් පිදුම් කරන්නට පටන් ගත් බවත් පරමනාදන් පවසයි.

කෙසේ හෝ මෙම පා සටහනේ කිසියම් පුරාවිද්‍යාත්මක අගයක් තිබේ දැයි විමසා බැලීම පිණිස මධ්‍යම පළාතේ පුරාවිද්‍යා නිලධාරීන් එහි ගොස් ඇති අතර ඒ වන විටත් ‍එම සලකුණු සුවඳපැනින් නාවා මල් සුවඳ දුම් ආදිය ඊට පුදා ඇති බව නිරීක්ෂණය විය. එහෙත් ඒ පිළිබඳව වැඩිදුරටත් විමසීමේ දී ඔවුනට වැටහී ගියේ එය එම ගලෙහි ඇති ස්වභාවික පිහිටීමක් පසුව කෘත්‍රිමව පාදයක් සේ සකස් කොට එහි ඇඟිලි සලකුණු පවා කෘත්‍රිමය නිර්මාණය කොට ඇති බවකි.එමෙන්ම අක්කරයක් පමණ වන මෙම පර්වතය ‘කුඩු ගල්’ පාෂාණයක් වන අතර නියනකින් හෝ උල්කටුවකින් එම පාෂාණයෙහි යම් යම් වෙනස්කම් කළ හැකි බව අඹගමුව ප්‍රාදේශීය ලේකම් ආර්.පී.ජී. සුමනසේකර මහතා කළ නිරීක්ෂණයකින් තහවුරු වි තිබෙනවා. ඒ අනුව මෙය කාගේ හෝ අරමුණක් මුල්කොට පසුගිය කාලයේ කෘත්‍රිමව සකස් කරන ලද පා සලකුණු දෙකක් බව පුරාවිද්‍යා නිලධාරීන්ගේ නිගමනය කර ඇති අතර. මෙහි දකුණු පා සටහන ලෙසින් දැක්වෙන පිහිටීමෙහි ඇඟිලි වශයෙන් සැලකිය යුතු කොටස ඉතා පැහැදිළි ලෙස කෘත්‍රිමව නිර්මානය කොට තිබූ අතර වම් පාදය ලෙසින් සැලකෙන කොටසද පාදයක් බව පෙන්වීම සදහා අවශ්‍ය හැඩතලය කෘත්‍රිමව සකස්කොට තිබුණි.

මේ සම්බන්ධයෙන් එම පාසලකුණු පිහිටි මෝකා වසමේ ග්‍රාම නිලධාරිනී ආර්.එම්.සිසිකුමාරි මහත්මිය පවසන්නේ මෙම සියළු මතයන් සම්පිණ්ඩනය කළ විට මෙහි කිසිදු පුරාවිද්‍යාත්මක වටිනාකමක් හෝ අද්භූත ස්වභාවයක් නැති බව මනාව තහවුරු වූ බවය.

එමෙන්ම බුදුන්ගේ සිරිපා සලකුණට පහලින් ශ්‍රී පාද රක්ෂිතයට යාබදව රාම දෙවිදුන්ගේ ද පා සටහනක් ඇතැයි යන පුවත රට පුරා ප්‍රචාරය වීමත් සමඟ ගාඩ්මෝර් කඩමණ්ඩියේ වෙළඳ ව්‍යාපාර වලට වැඩිපුර වාසි සැලසෙන්නට වූ අතර එම කඩමණ්ඩියේ සිට ෆෝක්මෝර් වතුයාය දක්වා වූ කිලෝ මීටර් 06 ක දුර සඳහා ත්‍රිරෝද රථ ගාස්තුව රුපියල් 1000/- දක්වා වැඩිකොට ඇති අතර මල් සුවඳ දුම් ආදී පූජා භාණ්ඩ සහිත තාවකාලික වෙළඳසැල් කිහිපයක් ද ඒ අවට ඉදිව ඇත. එහෙත් මෙහි සත්‍යතාව තහවුරුවීමෙන් පසුවද තවමත් මෙය රාම දෙවිදුන්ගේ පාද සටහනක් සේ සලකා එයට වැඳුම් පිඳුම් කරන්නවුන් දක්නට ලැබීම අප රටේ ජනතාවගේ අන්ධ මානසිකත්වය මැනවින් හුවාදක්වන්නකි.

You may also like...

Leave a Reply

Your email address will not be published. Required fields are marked *

error: Content is protected !!